බුදු රජාණන් වහන්සේ තුන්වන වර ශ්‍රී ලංකාවට වැඩිය අවස්ථාවේදී රහතන් වහන්සේලා 500 නමක් සමග සමාධි සුවයෙන් සිටි කිහිරි උයනේ ඉදි කර ඇති චෛත්‍යයයි. එසේම මෙම දාගැබ පුරාණයේදී මගුල් මහා සෑය යන නමින් හැදින්වුනු අතර කවදා කෙසේ "කිරි වෙහෙර" වුයේ දැයි තොරතුරු දැන ගත නොහැක.
ජනප්‍රවාද වලට අනුව මෙම ස්ථුපයේ සිද්ධාර්ථ කුමාරයා අභිනිෂ්ක්‍රමණය කිරිමෙන් පසු කෙස් කපන ලද කඩුව මෙහි තැම්පත් කර ඇති බව පැවසේ. මෙම ස්ථුපය ගරා වැටි තිබි ප්‍රතිසංස්කරණය කර ඇත. වර්ග අඩි 130 ක ප්‍රමාණයෙන් යුත් අඩි 10 ක් උස වේදිකාවක් මත ස්ථුපය ඉදි කර ඇත. එසේම ස්ථුපයේ උස අඩි 92 කී. වට ප්‍රමාණය අඩි 280කී. කිරි වෙහෙර දාගැබ මළු තුනක් සහිත දාගැබකී. දාගැබේ සලපතල මළුව අඩි 120 කින් යුත් සමචතුරශ්‍රයකී. වැලි මළුව අඩි 230 කින් යුත් සමචතුරශ්‍රයකී. ඊට පහලින් ඇත්තේ ගජන් මළුව වශයෙන් හදුන් වන බිම අඩි 384 ක් වන සමචතුරශ්‍රයකී.
කතරගම කිරි වෙහෙරය සොලොස්මස්ථාන වලින් එකකී.
ඓතිහාසික තොරතුරැ අනුව මෙම දාගැබ මහානාග රජු විසින් කරවන ලද දාගැබක් ලෙසට ප්‍රචලිතයි. (ක්‍රි:පු: 3 වන සිය වස) එහෙත් මෙම දාගැබ අවට කරන ලද කැනීම් වලින් ක්‍රී:ව: 1 වන ශත වර්ෂයට අයත් බ්‍රාහ්මීය අක්ෂර සහිත ලිපි කිහිපයක් හමුවී ඇත. එසේම පසු කාලීන යුග වලට අයත් වු සෙල්ලිපි කිහිපයක් මෙම කිරි වෙහෙර භූමියේ තිබී හමුවී ඇත.
